مستندات ملف العامل ومسوغات التعيين

مستندات ملف العامل ومسوغات التعيين

مستندات ملف العامل ومسوغات التعيين بالنسبة لإدارة شئون العاملين فى مصر وبالأخص قسم شئون العاملين ، من المهم واول ما بنقوم به مع اى موظف جديد اننا بنحدد له مصوغات التعيين ( الاوراق المطلوبة منه لتعينه فى الشركة ) واللى هنفتح له بيها ملفة فى الشركة ونعمل بيها تميناته وعقد العمل الخاص به وكمان هنتعامل بيها فى كل سجلاتنا وشغلنا على مدار مدة خدمة العامل فى شركتنا.

فى المقالة دى هنتكلم عن مصوغات التعيين كلها وايه هى استخدامات كل ورقة منهم فى الشغل وليه بنطلبها من الموظف.

اولًا : اهم مكونات ملف العامل ( العامة واللى هنلاقيها فى اى شركة أو آى منشأة :-

• أصل شهادة الميلاد .
  وهى اول حاجة بنتعامل بيها عند تسجيل اسم الموظف فى اى سجل أو ال computer system لانه لازم يكون مطابق للاسم اللى فى شهادة الميلاد بالحرف جون اى تغييرات ودا علشان نتجنب اى تلاعب فى المستقبل.
• أصل شهادة المؤهل الدراسي .
  طبعا فى ظل التلاعب المستمر بين الناس والتزوير المنتشر لازم تتأكد من مؤهل الشخص اللى قدامك ، دا بالاضافة انه من غيرها يكون عقد العمل باطل ولا يصح.
• أصل شهادة الموقف من التجنيد ( للذكور فقط ) .
  كل مشأة بيكون عليها رقابة وتفتيش من القوات المسلحة ودى مهمتها التأكد من أن الشركة لا تحتوى او تأوى هاربين من التجنيد ، لذلك لازم ولابد من انك تستلم اصل شهادة التجنيد من كل موظف ( ذكر ) عايز تعينة عندك.
• صورة شهادة القيد بمكتب العمل ( كعب العمل ).
  ودا بقى العامل بيروح يجيبه لك من مكتب العمل وبيكون مقسم إلى جزئين:-
  الاول يخص مكتب العمل وبيكتب فيه الموظف المختص بيانات الراجل بتاعك اللى عايز تعينة ويختم بخاتم مكتب العمل.
  الجزء الثانى ودا يخصك انت بتكتب فيه البيانات الوظيفية للشخص اللى عايز تعينة زى المسمى الوظيفى والراتب وهكذا.
  ثم بترد كعب العمل بعد ما تكتب الجزء اللى يخصك وتختمه بخاتم شركتك إلى مكتب العمل فى مدة اقصاها 30 يوم من تاريخ التعيين.
  ( وطبعا ممكن ترسله عن طريق جواب بعلم الوصول من اقرب مكتب بريد ).
• الرقم التأميني / برنت التأمينات .
  ودا يقدر الموظف يجيله لك من مكتب التأمينات الاجتماعية وبيكون فيه بيانات الموظف التأمينية واللى اهمها الرقم التأمينى وإجمالى المدد المؤمن عليه بيها وكود الاشتراك التأمينى لوظائفه السابقة.
• نتيجة الكشف الطبي الابتدائي .
  مهم جداً علشان تنهى بيه اجراءات التأمين الطبي على الموظف الجديد وتستخرج له بطاقة التأمين الصحى.
• 6 صور شخصية على الأقل.
  هتستخدما فى حاجات كتير زى صورة ال ID للموظف وصورة البطاقة الصحية وصورة كمان على ملف العامل.
• صورة البطاقة الشخصية (مع الاطلاع على الأصل ) .
• أصل شهادة الحالة الجنائية ( فيش وتشبيه ) باسم جهة العمل المتقدم إليها ( شركتك ) ويكون سارة المفعول .
  طبعا كلنا عارفين ان الفيش والتشبيه مهم جدا لمعرفة اذا كان الشخص اللى عايز تعينة مطلوب جنائيا او عليه قضايا او اى شىء مخالف للقانون.
  ( بس خلى بالك ان لو الموظف كان عليه قضية ما وقضى مدة الحبس المحكوم عليه بيها مش هتظهر لك فى الفيش ).

وطبعا بنضيف لكل دا عقد العمل الخاص بالموظف ( واللى بيكون 3 نسخ أصل واحدة للعامل وواحدة لكتب العمل والتأمينات والنسخة  الاخيرة تحفظ فى ملف العامل )

ثانيا: مكونات ملف العامل المطلوبة لحالات معينة:-

• صورة رخصة القيادة ( للسائقين ) الأصل للإطلاع ( سارية المفعول ) .
• شهادة تأهيل معاقين ( للمعاقين ) سارية المفعول .
• شهادة قياس مستوي مهارة ( للمهنيين ) سارية المفعول .
• ترخيص بمزاولة المهنة ( للمهنيين ) ساري المفعول .
• الشهادة الصحية سارية المفعول للعاملين بالأغذية والمشروبات .
• شهادات خبرة سابقة في مجال التعيين .
• إخلاء طرف من آخر منشأة عمل بها .
• نموذج 105 ( تحديد المستفيدين من التعويض الإضافي ).
• نموذج 105 مكرر ( تحديد المستفيدين من منحة الوفاة ).